CLICK HERE FOR BLOGGER TEMPLATES AND MYSPACE LAYOUTS »

السبت، 1 نوفمبر 2008

يا سلام على أيام زمان

بينما انا جالسة على الكمبيوتر اتصفح بعض المدونات سمعت صوت الباب روحت فتحت
دي خالتي و بنتها و بنت خالتي تانية اتو لزيارتنا
يا مرحبا يا مرحبا
المهم قعدنا نتكلم و ندردش الى ان وصل بينا الحديث عن الازمة المالية الي صايبة العالم الان
فبدات الاراء و الافكار تطرح على منصة الحوار
فابويا بيقول دي ازمة حتخلي الناس تعمل حسابها لحاجات و مش عارفة ايه
و تجي بنت خالتي و تقولو دي نسبة الانتحار ارتفعت
و تجي ماما و تقول الله اعلم هي حتفضل قد ايه
و طبعا انا ساكتة و فاتحة وذاني معاهم
فجت خالتي و قالتلهم يااااااه ده احنا كنا زمان عايشين في الفقر و مرتاااحين اوي و لا كان همنا البيت و المال و وجع الراس دة
المهم كنا مستورين و الاهم كنا سعيدين
و قعدت بقى تحكي كلام طويل عريض على حياة ايام زمان
ياااه انا كنت قاعدة بسمع و عمالة بتخيل بجد شوقتني اوي ان الزمن يرجع بينا لورا
طبعا نص الكلام نسيتو عشان بعيد عنكم الزهيمر
بس هحكلكم شويا الي علق في دماغي
قالت كانوا عايشين في حارة صغيرة و الجيران كانهم اهل و كل بيت مليان طبعا
اصلهم كانوا لسة ميعرفوش حاجة اسمها تحديد النسل
والناس على نياتها و مفيش مشاكل و لا حوادث من اللى بنسمع عنها اليومين دول و مفيش سرقه ولا غش و لا خيانة ...
و الناس تساعد بعض و تعاون بعض
و الغني يدي للفقير و القوي يساعد الضعيف
و المتعلم يعلم الجاهل
يا سلام في حاجة اجمل من كدة
ولا احكلكم بقى لما ظهر التلفزيون كانت في الحارة كلها عيلة وحدة الي عندها تلفزيون و كانها عندها حاجة كبيرة اوي
و يا سلام بقى و الجيران كلهم يتلمو عندها عشان يتفرجوا في سهرة السبت
و الضحكات تملا المكان و الحب و الصدق باين على وجوههم
الحياة كان لونها ابيض و كل حاجة جميلة و نقية
انا حاولت اوصلكم نص الصورة الي وصلتلي من كلام خالتي
الخلاصة :نستنتج من الكلام دة كله ان السعادة ليست في المال بل هي في القناعة و النقاء و الصفاء الي فقدناهم في ايامنا الحالية و عشان كدة تاهت عننا السعادة

53 التعليقات:

شمس النهار يقول...

نرجع ونقول لازم نرجع للدين والاخلاق
همه دول مفتاح القناعه والسعده
وترج اخلاق الايثار
اي
حب لأخيك كماتحب لنفسك
تبسمك في وجه اخيك صدقه
الكلمه الطيبه صدقه
وربنا يكرمنا جميعا

بنت مصريه يقول...

تعرفى برنامج صبايا كان عامل استفتاء بين الناس عن الموضوع ده

اللى بياخد 300 جنيه ف الشهر بيقول نفسى اكسب الف
واللى بياخد الف بيقول نفسى اخد الفين

واللى بياخد عشرين الف بيقول ليه ما اخدش تلاتين الف
زى البحر يعنى بيحبوا الزياده
هههههههه

المشكله مابقتش ف الرزق المشكله بقت بالرضا بالرزق
حتى المليونير بقى عايز يحسن مستواه


بوست هايل وحكمته اجمل منه
احييكى يا قمر

مـجـنـووون يقول...

الخلاصة :نستنتج من الكلام دة كله ان السعادة ليست في المال بل هي في القناعة و النقاء و الصفاء الي فقدناهم في ايامنا الحالية و عشان كدة تاهت عننا السعادة


بعد الخلاصة مش حقدر ااقول أي حاجه تانيه

أنتي جبتي من الأخر

تقبلي مروري سيدتي
مجنووون

الرومـيصاء يقول...

ياسلام
كم اتمنى ان يرجع الزمن
كما كان
والسعاده فى اتباع شرع الله والا
فسنكون كما قال الله

(ومن اعرض عن ذكري فان له معيشة ضنكا ونحشره يوم القيامة اعمى )

اللهم لا تجعلنا منهم

دمتى بحفظ الله

blue-wave يقول...

متفق معكى تماما
ربنا يكرمك يارب

رحيق الحياة يقول...

لما لا نجعل الحاضر أفضل؟؟ و لما لا نتعلم مما مضي و نطبقه في هذا الحاضر الذي لم أعد أفهم منه شيئا

عارفة أنا عشت في تونس 12 سنة و 8 سنين في إيطاليا، لما جيت إيطاليا سبت كله هناك سبت أصحابي و عيلتي بس لما سألوني إيه أحلي قلت إيطاليا طبعا
قالوا ليه:
قلت هناك في تونس تلاقي كل جار بيقطع في جاروا عمل إيه...الناس ملهاش شغلانة غير النميمة....
هو ده لبس كده عشان باباه مش بيصرف عليه و ديه متخانقة مع جوزها عشان ده و ده
فيييييييه إيه؟؟

هنا في ايطاليا مفيش حد بيبص الحد و لا يقولوا إنت عامل كده ليه و ده ليه، كله في حاله

هو العيب فينا و إلا إيه؟؟؟

لما يقولولي بتحبي إيطاليا ليه؟؟ بقول عشان راحت البال
**********

عارفة إني خرجت عن الموضوع بس لازم نغير في أنفسنا عشان نرجع أيام زمان

تحياتي

أختك رغدة

كـــيــــــــارا يقول...

بصي ياقمر طبعا انا مش هقول حاجه علي كلمه خلاصه لانها فعلا صح

لكن هقول عن الصوره اللي وضحتيها عن زمان

هقولك ان كل جيل بيكون شايف الجيل اللي قبله انه افضل منه

والكبار بيظهرو الصوره حلوه لانها بتكون متمثله في ذكريات

والذكري في الغالب بتكون مستخلصه من ايام حلوه ومتصفيه من المشاكل

اصل مش في سعاده وعمرك ماهتحسي انك سعيده الا لما تكوني عارفه يعني ايه الم

mohamed ghalia يقول...

ان السعادة ليست في المال بل هي في القناعة و النقاء و الصفاء الي فقدناهم في ايامنا الحالية و عشان كدة تاهت عننا السعادة
واله كلمات خلاصة سنين وخلاصة تجارب
أكيد عندها حق
تحياتى

موناليزا يقول...

تعرفى فكرتينى ببرنامج كانوا بيتكلموا فى الموضوع ده برضه ولقيت واحد فيهم بيقول انا جايب طبلية آكل عليها انا وولادى عشان احس بلمتهم حواليا لان السفرة بنبقى بعيد اوى وكل واحد له سرفيسه الخاص الطبلية بقى كلنا فى طبق واحد
انتى عارفة طبعا ان غالبية البيوت فيها اكتر من تليفزيون وده برضه بيخلى كل واحد لوحده ودايما بقترح ان المفروض البيت الواحد يبقى فيه تليفزيون واحد والعيلة كلها تتجمع ويتفرجوا على حاجة واحدة بس تقولى ايه ولمين مايعرض فى وسائل الاعلام يخلى اللى امكانياته ماتسمحش مثلا بانه يجيب اكتر من تلفاز انه ممكن يستلف عشان يبقى ذى الناس
وكما قلتى حبيبتى المهم الرضا والقناعة

Sweet Violet يقول...

الخلاصة :نستنتج من الكلام دة كله ان السعادة ليست في المال بل هي في القناعة و النقاء و الصفاء الي فقدناهم في ايامنا الحالية و عشان كدة تاهت عننا السعادة

معكى حق فعلا لو كل واحد بقى راضى عن حاله هايلاقى السعاده و هايتمحى الغل و الحقد على الاخر

Teawater يقول...

المهم كنا مستورين و الاهم كنا سعيدين

برايي ان الكلمتين دول هم مغزى ردي وزي ما بحب دايماً اجيب من الأخر
ياريت تتقبلي مروري
مدونة جميلة حقاً

وردشان smilyrose يقول...

اول زيارة

ودى البداية

على فكرة فعلا زمان برغم قلة الموارد

كان فيه حاجات فقداناهه دلوقتى

الأمان والطمأنينة والخوف المتبادل على

بعض وبقى فيه شئ من الخوف لا دا الخوف

نفسه وعدم الرضا والبحث عن ما هو

غير ضرورى لكنه شكليات

ياريتنى نتمسك بعدات زمان لكننا نعود

لزمان اظننا مش هنقدر

اسلوبك جميل يا صغيرتى وفوق الرائع

smilyrose

روح الحب الصادق

MISS\GH يقول...

عزيزتى اقدرك بشده واسجل اعجابى بموضوعاتك الجميله وماورائها وحقيقى اتمنى لكى دوام النجاح والتوفيق واشكرك بشده على ارائك الجميله التى سجلتيها لى فى موضوعات مدونتى
اما بالنسبه للموضوع فانا معجبه بيه جدا واتفق معك فى خاتمته واطلب من الله ان ينعم عليكى وعلينا بالهدايه والقناعه وشكر الله على كل نعمه .

saragebaly يقول...

صديقتي

العيب مش في الزمن

للاسف العيب بقى في النفس البشرية

اللي مش بترضى بقليل ولا بكتير واهم حاجة انها تاخد اللي في ايد غيرها واكتر منه

ناس بتبيع رصيد اخلاقهم علشان يزيد رصيد البنك عندهم

الدين والاخلاف اهم حاجتين من غيرهم الامة مش هتكون

ربنا يخرجنا من الدنيا على خير

تحياتي وتقديري لكِ

سارة

ghorBty يقول...

السلام عليكم ورحمة الله وبركاته

بجد ما اجملها من ذكريات والاحلي فيها روح الحب اللي كانت موجوده احنا دلوقتي حاسيين اننا بقينا عمالين زي الالات الكل بيقول يلا نفسي وتوهان كدا مش عارفه ليه

وفعلا كان مستواهم المادي زمان اقل من كدا بكتير والحاجه كانت متوافره وقليلا ما تجدي من يشتكي لكن دلوقتي الغني والفقير كلهم بيشتكوا اولا ان ما بقاش فيه قناعه وثانيا ودا اظنه السبب الاساسي مفيش بركه دائما ما اقول
العبره ليست بالكثره ولكن في البركه
حتي لو مستواي الواحد قليل وربنا بارك له في ماله هيحس انه ملك في الدنيا دي
ونزع البركه بتخلي الواحد حتي لو معاه مليارات مش حاسس بسعاده والفلوس هتطير منه من دون ما يحس
واكيد نزع البركه دا بسبب فلعنا نعرف السبب اي عقل يبحث عن السبب سيجد انه بعدنا عن الحق سبحانه وعدم التقوي
حتي تأملي معاي قول الله عز وجل
وَلَوْ أَنَّ أَهْلَ الْقُرَى آمَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالأرْضِ
يبقي البركات بتنزل بسبب الايمان والتقوي
ربنا يجعلنا من المتقين
جزاك الله خيرا وبارك الله لك في عمرك ومالك واهلك بفضله وكرمه
جمعني الله واياك في مستقر رحمته
اني احبك في الله
والسلام عليكم

rovy يقول...

السلام عليكم
الحقيقه عندك حق و بجد وصلنى احساسك قوى .. كثير بنحن للبساطه و نشتاق للمة العيله اللى نسيناها فى زحمه الحياه و انشغالنا بالماده ..و حاجات كثير حلوه بتضيع مننا فى زحمه و دوامه الحياه و بننسى ان العمر بيعدى و ان الايام اللى بتضيع مننا مش ممكن ترجع ولا نعوضها و فعلا السعاده اختى الحبيبه عمرها ما كانت بالفلوس ابدا .. هى فعلا فى راحة البال و لمة الاهل و الاصحاب
والرضا و القناعه و صفاء النفس و قبل ده كله فقربنا من الله عز وجل و احساسنا انه معانا و راضى عننا ..

دمتى غاليتى بكل خير و سعاده

تحياتى

الربان يقول...

تحياتي

في رأيي ان السعادة هي " راحة البال "

نم قرير العين تكون اسعد الناس....


تحياتي و تقديري

Unknown يقول...

السعادة تكمن فى رضا الله
وقناعه الانسان بما لديه
تحياتى لك
موضوعك رائع سلمت اناملك

Unknown يقول...

يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

*الطالبة عفو الله *زوزو يقول...

شمس النهار

طبعا لا سعادة مين غير دين
و لا دين غير دين الاسلام
و الايثار من الخلق العظيم الي يخلي ناس كويسة مع بعش فعلا
لو كل واحد حب لغيره الي يحبه لنفسه حتسعد البشرية و تعيش في سلام
بارك الله فيك اختي نورتي بتعليقك

*الطالبة عفو الله *زوزو يقول...

بنت مصريه

يا بنتي دة كله عشان مفيش قناعة مفيش رضا بما قسمة الله

ربنا يبارك فيك يا قمر

نورتي

*الطالبة عفو الله *زوزو يقول...

مـجـنـووون

اهلا بك اخي نورتي

اسعدني تواجدك


دمت في حفظ الله

*الطالبة عفو الله *زوزو يقول...

الرومـيصاء

طبعا حبيبتي السعادة كل السعادة في اتباع شرع الله

و ما وصلنا اليه ما هو الا نتيجة بعدنا عن شرع ربنا و اتباعنا الهوى وزينة الحياة الفانية

هدانا الله و اصلح حالنا

بارك الله فيك اختي

اسعدني مرورك يا غالية

*الطالبة عفو الله *زوزو يقول...

blue-wave

اهلا يا عمرو نورت

في امان الله

*الطالبة عفو الله *زوزو يقول...

رحيق الحياة

لما لا نجعل الحاضر أفضل؟؟

هذا كل منايا و الله بس فيييين

الله المستعان

لا يغير الله ما بقوم حتى يغيرو ما بانفسهم


عارفة أنا عشت في تونس 12 سنة و 8 سنين في إيطاليا، لما جيت إيطاليا سبت كله هناك سبت أصحابي و عيلتي بس لما سألوني إيه أحلي قلت إيطاليا طبعا
قالوا ليه:
قلت هناك في تونس تلاقي كل جار بيقطع في جاروا عمل إيه...الناس ملهاش شغلانة غير النميمة....
هو ده لبس كده عشان باباه مش بيصرف عليه و ديه متخانقة مع جوزها عشان ده و ده
فيييييييه إيه؟؟

و دة الي بيقهرنا فعلا
انا برضو عايشة في اسبانيا و في مواقف كتير بحس اننا وسط مسلمين مين غير اسلام خلاف بلادنا العربية اسلام من غير مسلمين

هو العيب فينا و إلا إيه؟؟؟

طبعا العيب فينا

نعيب زماننا و العيب فينا
و ما لزماننا من عيب سوانا

نورتي حبيبتي

و اسعدني ردك و رايك

بارك الله فيك

*الطالبة عفو الله *زوزو يقول...

كـــيــــــــارا

هو ممكن يكون كلامك صح من ناحية
بس ماهما كان بيبقى زمان احسن من الحاضرو بكتير كمان

نورتي يا جميل

دمتي في حفظ الله

*الطالبة عفو الله *زوزو يقول...

mohamed ghalia

نورتي اخي محمد

طبعا انت ادرة بموضوع السعادة مني

بارك الله فيك

*الطالبة عفو الله *زوزو يقول...

موناليزا

اه فعلا اللمة في طبلية ليها طعم خاص
و ليها اقر في النفوس
ناس كثيرة مبتهتمش بالامر دة و مبتعرفش اهميتها في العلاقة بين الافراد

بارك الله فيك اختي
نورتي بتعليقك و ما فيه من راي

دمتي في حفظ الله

*الطالبة عفو الله *زوزو يقول...

ضد التيار

نورتي حبيبتي

اسعدني ردك يا جميل

دمتي في حفظ الله

*الطالبة عفو الله *زوزو يقول...

Teawater

اهلا بك اختي نورتي المدونة

و يا رب تكون دي اول زيارة ليكي و مش الاخيرة

بارك الله فيك

اسعدني تواجدك

في امان الله

*الطالبة عفو الله *زوزو يقول...

smilyrose

نورتي اختي باول زيارة ليك و يا رب تكون بداية لزيارات اخرة و متابعة دائمة

هو اي نعم رجوع للزمن الماضي مستحيل لكن نعرف احنا كنا فين و بقينا فين
علنا نستفيق من الغفلة و دوامة الحياة

بارك الله فيك اختي

فعلا اسعدني تواجدك

في امان الله

*الطالبة عفو الله *زوزو يقول...

MISS\GH

اختي نورتي المدونة بطلتك الجميلة

اشكرك على جمال كللامك

و اشكر الله ان المدونة نالت استحسانك
و اتمنى ان تكون من المتابعين

بارك الله فيك

دمتي في حفظ الله

*الطالبة عفو الله *زوزو يقول...

saragebaly

العيب مش في الزمن

للاسف العيب بقى في النفس البشرية

فعلا حبيبتي صدقتي

قال الشاعر

نعيب زماننا و العيب فينا

و ما لزماننا من عيب سوانا

اللي مش بترضى بقليل ولا بكتير واهم حاجة انها تاخد اللي في ايد غيرها واكتر منه

ناس بتبيع رصيد اخلاقهم علشان يزيد رصيد البنك عندهم

و كل دة عشان مفيش قناعة مفيش رضا

بارك الله فيك حبيبتي

*الطالبة عفو الله *زوزو يقول...

ghorBty

و عليكم السلام و رحمة الله و بركاته

بجد ما اجملها من ذكريات والاحلي فيها روح الحب اللي كانت موجوده احنا دلوقتي حاسيين اننا بقينا عمالين زي الالات الكل بيقول يلا نفسي وتوهان كدا مش عارفه ليه

عجبني اوي التشبيه لانتي عملتيه
فعلا لو فكرنا مع نفسينا مش حلاقي اختلاف كبير بينا و بين الالات

وفعلا كان مستواهم المادي زمان اقل من كدا بكتير والحاجه كانت متوافره وقليلا ما تجدي من يشتكي لكن دلوقتي الغني والفقير كلهم بيشتكوا اولا ان ما بقاش فيه قناعه وثانيا ودا اظنه السبب الاساسي مفيش بركه دائما ما اقول

صح اختي كمان موضوع البركة ليه دور فعلا
اه مبقتش في بركة لا في المال و لا في الزمن و دة من علامات الساعة

جزاك الله خيرا وبارك الله لك في عمرك ومالك واهلك بفضله وكرمه
جمعني الله واياك في مستقر رحمته

امين و اياكم غاليتي


اني احبك في الله

احبك الله الذي احببتني فيه

و عليكم السلام و رحمة الله و بركاته

*الطالبة عفو الله *زوزو يقول...

rovy

و عليكم السلام و رحمة الله و بركاته

صدقت في كل كلمة قلتيها و مسبتليش مجال اننا اضيف شيء على تعليقك

بارك الله فيك حبيبتي

اسعدني ردك

دمتي في حفظ الله

*الطالبة عفو الله *زوزو يقول...

الربان

اهلا بك اخي

في رأيي ان السعادة هي " راحة البال "

فعلا السعادة في راحة البال و عشان توصل لراحة البال لازم تمر بمحطات الى و هي

القناعة و الرضى ...

بارك الله فيك اخي

اسعدني ردك

في امان الله

*الطالبة عفو الله *زوزو يقول...

نهر الحب

اهلا بك اختي نورتي

السعادة تكمن فى رضا الله
وقناعه الانسان بما لديه


الموضوع كله بيلف و يدور في العبارتين دول

جيبتي من الاخر

بارك الله فيك اختي

دمتي في حفظ الله

*الطالبة عفو الله *زوزو يقول...

نهر الحب

ربنا يوفقكم لكل خير اختي

بارك الله فيكم و في مجهوداتكم الخيرية

جزاكم الله خيرا

كم كنت اود ان اكون معكم

الله المستعان

وفقكم الله لكل خير

mohamed ghalia يقول...

ليكى تاج عندى ياريت تقبليه
فى إنتظار إجاباتك الرائعة
تحياتى

*الطالبة عفو الله *زوزو يقول...

mohamed ghalia

ملحقتش افرح مع نفسي و انا مين غير تاج

الله المستعان

حاضر يا محمد ان شاء الله عما قريب ساجاوب

بس استنى عليا شويا
لاني لسة مجاوبة على تاج قبل البوست دة
مينعش اخلي المدونة كلها تاجات

سلام

عاشقة القمر يقول...

انا من ناس بقول ياريت نرجع زي زمان
مش عارفه انا بقول دي علامات الساعه

nona يقول...

عارفة لية زمان كان احلى ودلوقتى لية اوحش و الكل بيتمنا يرجع يعيش تانى زمان
لان كل حاجة اتغيرت حتى نفوس البشر
فلو عايزين نرجع نعيش زاى زمان لازم احنا الاى نتغير الاول
نعيب فى زمانا و العيب فينا ومال لزمانا عيب سوانا

قلب شاعره يقول...

مممم والله كلامك حلو واشتياقك له معنى ..
بس عارفه احنا تركنا ما اذا تمسكنا به لن نضل ابدا .. بعدنا عن الدين ..وكا حاجه باظت بعدها .. بس عارفه ان هيجى وقت من الزمن ويكون فيه الحفاظ على الدين صعب جدا .. حاسه ان زماننا محتاج جهاد نفسى اكبر
علشان نكون صح وبالتالى هنكون اسعد ..
عارفه ان سبب ظهور حكاية المدونات دى هى عدم وجود علاقات اجتماعيه بين الناس
وموضوعك جميل جدا وانت جبتى الكلام المختصر المفيد ....

*الطالبة عفو الله *زوزو يقول...

عاشقة القمر

صدقت يا اختي فعلا الحال الي وصلناله من علامات الساعة فعلا

اللهم احفظنا يا رب

بارك الله فيك اختي

اسعدني تواجدك

دمتي في حفظ الله

*الطالبة عفو الله *زوزو يقول...

nona


عارفة لية زمان كان احلى ودلوقتى لية اوحش و الكل بيتمنا يرجع يعيش تانى زمان
لان كل حاجة اتغيرت حتى نفوس البشر

تعرفي يا اختي لو كان العالم كل من حولنا اتغير بس النفوس البشرية فضلت على حالها لكنا حنكون سعيدين و مكنش
حيأثر علينا التغير الي بيحصل و لو اثر حيأثر ايجابيا مش سلبيا

فلو عايزين نرجع نعيش زاى زمان لازم احنا الاى نتغير الاول

قعلا و لا يغير الله ما بقوم حتى يغيروا ما بأنفسهم

بارك الله فيك حبيبتي

في امان الله

*الطالبة عفو الله *زوزو يقول...

قلب شاعره


عارفه احنا تركنا ما اذا تمسكنا به لن نضل ابدا .. بعدنا عن الدين ..وكا حاجه باظت بعدها

صدقت فيما قلتي اختي فعلا ما نراه و نعشه من ازمات و مشاكل و مصائب ما هو الا نتيجة بعدنا عن ديننا و ضعف ايماننا

بس عارفه ان هيجى وقت من الزمن ويكون فيه الحفاظ على الدين صعب جدا

جاء في سنن الترمذي الحديث التالي ( ‏يأتي على الناس زمان الصابر فيهم على دينه كالقابض على الجمر )

و هذا من علامات الساعة

عارفه ان سبب ظهور حكاية المدونات دى هى عدم وجود علاقات اجتماعيه بين الناس

مش بالضرورة هي اه فعلا العلاقات الاجتماعية كادت تنعدم و لا يبقى منها سوى علاقات المصلحة
لكن التدوين شيء جميل نحاول من خلاله التقرب من بعض اكثر

بارك الله فيك اختي

اسعدني فعلا تواجدك و تعلقيك

funckydoctor يقول...

أول مرة أزور المدونة هنا :]
بجد ربنا يكرمك
أما بخصوص الموضوع ده فالسعادة لا شك فى القناعة والرضا بما كتبه الله وعدم النظر الى ما فى يد الناس
السعادة كلها داخل عقلى سيدتى
تحياتى

Maha Shahen يقول...

السعاده فى الذكريات علي الاقل الواحد عارف هى بتحتوى علي ايه
عارف فين الجزء السيء فيها تبتعد عنه وفين الجزء اللي تتمنى لو يرجع من جديد

بس السعاده بتكون اكبر فلى جاى لما يحصل اللي عمرنا ما كنا نتوقعه

السعاده ليها مليون طريق وباب بس المهم احنا نختار هنمى في أى طريق علشان نوصل ليها
كل أنسان ادرى بمفاتيح قلبه

عجبنى جدا الموضوع يا زوزو وبعتذر لو اتاخرت في التعليق كعادتى السيئه
بس انتى عارفه انى من اوائل القراء
والتعليقات تيجى علي مهلها
دائمة التوفيق يا قلبي في اختيار المواضيع
خالص تحياتى ليكى

حبيبة الروح يقول...

فعلا ايام زمان كانت اهدي اجمل والناس كان قلبها علي بعض والي في ايديهم لبعض وكل حاجه كانت رخيصه بشكل مش معقول ماما بتقعد تحكيلي حاجات فظيعه ربنا يرحمنا من الايام دي

*الطالبة عفو الله *زوزو يقول...

funckydoctor

اهلا و سهلا بك

اتمنى ان تكون المدونة قد نالت استحسانك و ان تتكرر زيارتك

اما بالنسبة للبوست ففعلا هذا ما نناسد به ان السعادة في الرضا و القناعة

نورت اخي

دمت في حفظ الله

*الطالبة عفو الله *زوزو يقول...

nour shahen

حبيبة قلبي نورتي بطلتك الرائعة


السعاده ليها مليون طريق وباب بس المهم احنا نختار هنمشى في أى طريق علشان نوصل ليها

وهو دة المشكل انحنا مبنعرفش الطريق دة او بنعرفو بس مبنعرفش نمشي فيه

الله المستعان

ربنا يسعدنا دنيا و اخرى


عجبنى جدا الموضوع يا زوزو

الحمد لله انه عجبك و يا رب ديما اكون عند حسن ظنك حبيبتي

اسعدني ردك غاليتي

في امان الله

*الطالبة عفو الله *زوزو يقول...

حبيبه الروح

حبيبتي نورتي عالم التدوين مين جديد و نورتي المدونة عندي كلها

و يا رب ما يجيب غياب تاني

ايعدني ردك و صدقت في كلامك

دمتي في حفظ الله

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي